ٹیکسلا بائی پاس کے قریب فائرنگ
ٹک ٹاکر 28 سالہ خاتون جاں بحق جبکہ 12 سالہ بہن زخمی
ٹیکسلا: جی ٹی روڈ ٹیکسلا بائی پاس کے قریب فائرنگ کے افسوسناک واقعے میں 28 سالہ خاتون مسماۃ ش۔م، سکنہ فیصل ہلز ٹیکسلا، جاں بحق ہوگئی، جبکہ اس کی 12 سالہ بہن اسمیہ زخمی ہوگئی۔
ابتدائی اطلاعات کے مطابق خاتون اپنی بہن کے ہمراہ کار نمبر BWV-609 پر راولپنڈی جا رہی تھی کہ ٹیکسلا بائی پاس کے قریب موٹر سائیکل سوار مبینہ ملزم نے گاڑی روک کر خاتون پر فائرنگ کر دی۔ فائرنگ کے نتیجے میں دو گولیاں خاتون کی گردن پر لگیں، جس سے وہ شدید زخمی ہوگئی۔
ذرائع کے مطابق مقتولہ ٹک ٹاکر بھی بتائی جاتی ہے۔ خاتون کو فوری طور پر طبی امداد کے لیے منتقل کیا گیا، تاہم وہ زخموں کی تاب نہ لاتے ہوئے دم توڑ گئی۔
واقعے میں زخمی ہونے والی 12 سالہ بہن اسمیہ کو علاج کے لیے پمز ہسپتال اسلام آباد منتقل کر دیا گیا، جبکہ مقتولہ کی لاش ٹی ایچ کیو ہسپتال ٹیکسلا منتقل کی گئی۔
واقعے کے بعد پولیس نے جائے وقوعہ سے شواہد اکٹھے کرتے ہوئے تحقیقات شروع کر دی ہیں، جبکہ مبینہ ملزم کی تلاش جاری ہے۔ فائرنگ کی اصل وجہ اور واقعے کے محرکات تاحال سامنے نہیں آ سکے۔
